Kapital qoyuluşunun edilməməsi cəzalandırılacaq İnzibati Xətalar Məcəlləsinə edilmiş son dəyişiklikdə Məcəlləyə nizamnamə kapitalının ödənilməməsi və ya ödənilmiş nizamnamə kapitalı barədə məlumatın müvafiq quruma verilməməsinə görə cərimələr nəzərdə tutulmuşdur. Belə ki, Məcəllənin 405-1-ci maddəsinə görə Azərbaycan Respublikasının Mülki Məcəlləsində nəzərdə tutulmuş müddətdə məhdud məsuliyyətli cəmiyyətin nizamnamə kapitalının tamamilə ödənilməməsinə görə vəzifəli şəxslər min manat məbləğində, hüquqi şəxslər iki min manat məbləğində cərimə edilir. Həmin maddənin növbəti bəndinə görə isə məhdud məsuliyyətli cəmiyyətin tamamilə ödənilmiş nizamnamə kapitalı barədə məlumatın “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununda nəzərdə tutulmuş müddətdə müvafiq icra hakimiyyəti orqanının müəyyən etdiyi orqana (quruma) verilməməsi vəzifəli şəxslərin beş yüz manat məbləğində, hüquqi şəxslərin isə min manat məbləğində cərimə edilməsi ilə nəticələnəcək.