Enerji effektivliyi qanunvericiliyi dəyişdi: tikinti layihələri pasportlaşdırılmalıdır

Azərbaycan Respublikasının Milli Məclisi “Enerji resurslarından səmərəli istifadə və enerji effektivliyi haqqında” Azərbaycan Respublikasının Qanununa 17.3-cü maddə əlavə olunmuşdur. Dəyişikliklər enerji effektivliyi üzrə pasportlaşdırma tələbinin hansı bina və tikililərə şamil olunduğunun daha dəqiq müəyyən edilməsinə yönəlib.

Dəyişikliyə əsasən, yeni tikilən, yenidən qurulan və əsaslı təmir olunan yaşayış və qeyri-yaşayış binaları üçün enerji effektivliyi üzrə pasportun əldə edilməsi tələb olunur. Yeni maddə, tarix və mədəniyyət abidələri, yardımçı və müvəqqəti tikililər, istixanalar, anbar və istehsalat binaları, habelə fərdi yaşayış evləri bu tələbdən istisna edir.

Əlavə edilmiş 17.3-cü maddə enerji effektivliyi üzrə pasportlaşdırma tələbinin tətbiq dairəsini konkretləşdirməklə yanaşı, bu tələbin Şəhərsalma və Tikinti Məcəlləsinin müvafiq normaları ilə əlaqəsini də aydın şəkildə istinad edərək müəyyən edir. Belə ki, qanunvericiliyə əsasən, enerji effektivliyi üzrə pasportlaşdırma tələbi Məcəllənin 81.1-ci maddəsi ilə tənzimlənən açıq məkanda yerləşdirilən və sahəsi 60 kvadratmetr və ya daha çox olan reklam qurğularına şamil edilmir. Bu obyektlər öz mahiyyətinə görə yaşayış və ya qeyri-yaşayış binası hesab edilmədiyindən və enerji istehlakı ilə birbaşa əlaqəli olmadığından, onların enerji effektivliyi üzrə pasportlaşdırılması məqsədəuyğun sayılmır.

Eyni zamanda, enerji effektivliyi tələbləri Məcəllənin 89.1-ci maddəsində (89.1.4-cü maddə istisna olmaqla) nəzərdə tutulan, dövlət ekspertizasından keçirilməsi tələb olunmayan tikinti layihələrinə də tətbiq edilmir. Buraya insanların daimi yaşayışı və ya istehsalat fəaliyyəti üçün nəzərdə tutulmayan birmərtəbəli, aşırımının uzunluğu müəyyən həddi keçməyən tikililər, sanitar-mühafizə zonasının tələb olunmadığı və ya mövcud sanitar-mühafizə zonalarından istifadə şərti ilə tikilən istehsalat obyektləri, sahəsi müəyyən həddən çox olmayan birmərtəbəli binalar, sahəsi və mərtəbə sayı məhdud olan qeyri-yaşayış obyektləri, kiçik anbar və texniki binalar, mövcud tikililərə edilən və onların konstruktiv, təhlükəsizlik və digər mühəndislik göstəricilərinə təsir etməyən dəyişikliklər və əlavələr daxildir.

Beləliklə, Şəhərsalma və Tikinti Məcəlləsinin 81.1 və 89.1-ci maddələrinə istinad enerji effektivliyi üzrə pasportlaşdırma öhdəliyinin yalnız real enerji istehlakı və enerji səmərəliliyi baxımından əhəmiyyət kəsb edən obyektlərlə məhdudlaşmasını təmin edir. Bu yanaşma dövlət siyasətinin məqsədlərini qoruyub saxlayaraq, tikinti və şəhərsalma fəaliyyətinin praktiki ehtiyacları ilə daha balanslı hüquqi mexanizmin formalaşmasına xidmət edir.

Yuxarıda qeyd olunan dəyişikliklər 30 dekabr 2025-ci il tarixindən qüvvəyə minmişdir.