Çin və Azərbaycan ticarət əlaqələri və yeni sazişlər

 

Çin və Azərbaycan strateji siyasi tərəfdaşlığın inkişafı fonunda ticarət əlaqələrini gücləndirmişdir. Rəsmi mənbələrə əsasən, 2018–2023-cü illər ərzində Çin Azərbaycanın altıncı ən iri ticarət tərəfdaşından dördüncü yerə yüksəlmişdir. 2024-cü ildə iki ölkə arasında ticarət dövriyyəsi əvvəlki illə müqayisədə 20,7% artaraq 3,744 milyard ABŞ dollarına çatmışdır. Hazırda Çin Azərbaycanın ümumi xarici ticarət dövriyyəsinin 7,9%-ni təşkil edir və 17,69% payla ölkəyə idxalda birinci yeri tutur.

 

Hazırda, Azərbaycanda Çin kapitalı ilə yaradılmış təxminən 375 şirkət qeydiyyatdan keçmişdir ki, onlardan 298-i aktiv fəaliyyət göstərir.

 

2025-ci il aprelin 23-də tərəflər Azərbaycan Respublikası ilə Çin Xalq Respublikası arasında Hərtərəfli Strateji Tərəfdaşlığın Qurulması haqqında Birgə Bəyanat imzalamışlar. Sənəddə tərəflər qarşılıqlı investisiyaların təşviqi məqsədilə azad ticarət sazişi üzrə danışıqlara başlamağa hazır olduqlarını ifadə etmişlər.
 

Bundan əlavə, “Azərbaycan Respublikası ilə Çin Xalq Respublikası arasında cinayət işləri üzrə qarşılıqlı hüquqi yardım haqqında Müqavilə”  Azərbaycan Milli Məclisi tərəfindən ratifikasiya edilmiş və 2025-ci il iyulun 7-də rəsmi dərc edilmişdir.