Azərbaycanda süni intellektdən qanunsuz istifadə cinayət hesab ediləcək

21 aprel 2026-cı il tarixində Azərbaycan Respublikasının Cinayət Məcəlləsinə, Cinayət-Prosessual Məcəlləsinə, habelə “İnformasiya, informasiyalaşdırma və informasiyanın mühafizəsi haqqında” və “Media haqqında” qanunlara süni intellekt texnologiyalarının istifadəsi ilə bağlı dəyişikliklər edilib. 

Dəyişikliklərə əsasən, Cinayət Məcəlləsinə yeni 148-2 və 242-1-ci maddələr əlavə olunub. 

Cinayət Məcəlləsinin 148-2-ci maddəsinə əsasən, şəxsin razılığı olmadan onun görüntüsü və ya səsindən istifadə edilməklə süni intellekt texnologiyaları və ya xüsusi proqram təminatları vasitəsilə reallığı əks etdirməyən foto, video və audio materialların hazırlanması və ya yayılması cinayət məsuliyyəti yaradır. 

Bununla yanaşı, Cinayət Məcəlləsinin 242-1-ci maddəsi ilə şəxsin görüntüsü və ya səsindən istifadə edilməklə süni intellekt vasitəsilə pornoqrafik və ya seksual məzmunlu materialların hazırlanması və ya yayılması da cinayət məsuliyyəti yaradan əməl kimi müəyyən edilib. 

Eyni zamanda, “İnformasiya, informasiyalaşdırma və informasiyanın mühafizəsi haqqında” Qanuna edilən əlavəyə əsasən, süni intellekt texnologiyaları vasitəsilə hazırlanmış foto, video və audio materiallar kütləvi nümayiş etdirildikdə onların belə texnologiyalar vasitəsilə hazırlandığını aydın şəkildə göstərən və asanlıqla görünən nişanlanma ilə təmin edilməlidir. 

Bundan əlavə, “Media haqqında” Qanuna edilmiş dəyişikliklərə əsasən, şəxsin razılığı olmadan, onun görüntüsündən və ya səsindən istifadə etməklə süni intellekt texnologiyaları, habelə xüsusi proqram təminatları vasitəsilə hazırlanmış reallığı əks etdirməyən, yaxud belə texnologiyalar (proqram təminatları) vasitəsilə hazırlanmış pornoqrafik və ya seksual məzmunlu foto, video və ya audio materialların yayılmasına yol verilməməlidir.