Sənaye və texnologiyalar parklarına aid vergi və gömrük azadolması tətbiq edilən texnika və avadanlıqların siyahısı təsdiq edildi

Azərbaycan Respublikası Nazirlər Kabinetinin 16 iyun 2026-cı il tarixində qüvvəyə minmiş Qərarı ilə sənaye və texnologiyalar parklarının idarəedici təşkilatı və operatoru, habelə rezidentləri tərəfindən idxal edilən və əlavə dəyər vergisindən (ƏDV) və gömrük rüsumlarından azad olunan texnika, texnoloji avadanlıq və qurğuların siyahıları təsdiq edilmişdir.

Qərar Azərbaycan Respublikası Prezidentinin 29 dekabr 2025-ci il tarixli 563 nömrəli Fərmanının icrası məqsədilə qəbul edilmiş, sənaye və texnologiyalar parklarında fəaliyyət göstərən subyektlər üçün nəzərdə tutulmuş vergi və gömrük güzəştlərinin tətbiq dairəsini konkretləşdirir.

Təsdiq edilmiş siyahılar müxtəlif sənaye və istehsal sahələrində istifadə olunan texnika və avadanlıqları əhatə edir. Əsas kateqoriyalar aşağıdakılardır:

• sənaye və istehsal avadanlıqları;
• metal emalı və qaynaq avadanlıqları;
• nasoslar və kompressorlar;
• turbinlər və mühərriklər;
• elektrik mühərrikləri, generatorlar və transformatorlar;
• qazanlar və istilik sistemləri;
• soyutma və havalandırma sistemləri;
• filtrasiya və təmizləmə avadanlıqları;
• qablaşdırma və etiketləmə avadanlıqları;
• qaldırıcı və yükdaşıma avadanlıqları;
• konveyer sistemləri;
• tikinti və torpaq işləri texnikası;
• kənd təsərrüfatı texnikası;
• qida sənayesi avadanlıqları;
• tekstil sənayesi avadanlıqları;
• ağac və plastik emalı avadanlıqları;
• laboratoriya və ölçmə cihazları;
• sənaye avtomatlaşdırma sistemləri;
• 3D çap texnologiyaları;
• digər texnoloji qurğular və istehsal avadanlıqları.

Qeyd etmək lazımdır ki, idarəedici təşkilat və operator üçün nəzərdə tutulmuş siyahı rezidentlər üçün təsdiq edilmiş siyahıdan iki əlavə mal mövqeyi ilə fərqlənir. Həmin mövqelərə xüsusi təyinatlı mühərrikli nəqliyyat vasitələri (XİF MN 8705) və 8701–8705 mal mövqelərinə aid mühərrikli nəqliyyat vasitələri üçün mühərrik quraşdırılmış şassilər (XİF MN 8706) daxildir.

Siyahılara daxil edilmiş avadanlıqlar istehsal proseslərinin təşkili, sənaye infrastrukturunun qurulması, avtomatlaşdırma, enerji təminatı, materialların emalı və digər texnoloji fəaliyyət istiqamətlərində istifadə olunan geniş çeşidli texnika və qurğuları əhatə edir. Bununla da sənaye və texnologiyalar parklarında fəaliyyət göstərən subyektlərin texnoloji avadanlıqları daha əlverişli şərtlərlə idxal etməsinə, investisiyaların təşviqinə, istehsal xərclərinin azaldılmasına və sənaye fəaliyyətinin inkişafına töhfə verə bilər.